اسلام آباد۔19نومبر (اے پی پی) وزیراعظم عمران خان آکھیا جو عام بندے کوں گھر دی سہولت ݙیوݨ کیتے ہک لکھ گھر ٻݨدے پئن، بینک گھر ٻݨاوݨ کیتے 24 ارب روپے دے قرضے ݙے چکین۔ ماضی اچ کہیں حکومت عام بندے کوں گھر دی سہولت ݙیوݨ دا نی سوچیا، اساکوں انفراسٹرکچر ٻݨاوݨ اچ ݙو سال لڳ ڳئن، ہݨ تکھے ایں منصوبے تے کم تھیسی۔ اے ڳالھیں انہاں جمعے کوں فراش ٹائوں اچ 4400 اپارٹمنٹس ٻݨاوݨ دے منصوبے دے معائنے وچال آکھی۔ ایں منصوبے دامنڈھ ایں سال اپریل اچ رکھیا ڳیا ہئی۔ انہاں آکھیا جو ماضی اچ کہیں حکومت عام بندے کوں گھر دی سہولت ݙیوݨ دا نی سوچیا۔ اے انہاں دی ترجیح کائنا ہئی، ایں کیتے صرف پیسے آلے لوک ای آپݨا گھر ٻݨا سڳدے ہن۔ عام بندے کیتے اے ہک خواب ہئی۔ انہاں آکھیا جو اساکوں انفراسٹرکچر ٻݨاوݨ اچ ݙو سال لڳ ڳئن، ہݨ بینک عام بندے کوں گھر کیتے قرضے ݙیوݨ شروع کر ݙتن۔ انہاں آکھیا جو بھارت اچ 10 فیصد، ملائیشیا اچ 30 فیصداتے مغربی ملکاں اچ 80 فیصد گھر بینکاں دے قرضے ڳھن تے ٻݨائے ویندن جڈانجو پاکستان اچ 2018ء اچ اے شرح صرف 0.2 فیصد ہئی۔ انہاں آکھای جو حکومت ہائوسنگ دے شعبے اچ سبسڈیز ݙیوݨ دا اعلان کیتا۔ پنڄ مرلے دے گھر کیتے پہلے پنج سال اچ پنج فیصد سبسڈی ݙیوݨ دا فیصلہ کیتے، تلویں طبقے کوں سروس چارج تے ݙو فیصد سبسڈی ݙتی اتے پہلے پنج سال ݙاہ مرلے دے گھر کیتے ست فیصد مارک اپ دا اعلان کیتے۔ وزیراعظم آکھیا جو فراش ٹائوں ا?? 670 کنال تے 4400 اپارٹمنٹس ٻݨدے پئن۔ ایں اچوں 2000 ڳھٹ آمدݨ آلے طبقے کیتے ہن۔ ݙو ہزار مڈل انکم آلے اتے تنخواہ دار طبقے کوں ݙتے ویسن۔ ایں تے 15.3 ارب روپے دی لاگت امسی۔ وزیراعظم منصوبے تے تکھے کم کرݨ تے ایف ڈبلیو او، سی ڈی اے اتے نیا پاکستان ہائوسنگ اتھارٹی کوں خراج تحسین پیش کیتا۔
عام بندے کوں گھر دی سہولت ݙیوݨ کیتے ہک لکھ گھر ٻݨدے پئن، بینک گھر ٻݨاوݨ کیتے 24 ارب روپے دے قرضے ݙے چکین، وزیراعظم عمران خان دا فراش ٹائون اچ ٻݨݨ آلے اپارٹمنٹس دے معائنے دے موقع تے خطاب
مضمون کا ماخذ : bolão quina
متعلقہ مضامین
