حسن ابدال۔6نومبر (اے پی پی):وزیراعظم عمران خان آکھیے جو پاکستان کوایجھا ملک بݨاوݨ چاہندوں جو ٻاہروں قرضہ نہ منگݨاں پووے ،معیشت تکھے ترقی کریندی پئی اے۔ ایم ایل ون دی صورت اچ پاکستان اچ پہلی واری چین وݙی سرمایہ کاری کریندا پئے۔پاکستان سیاحت دے حوالے نال وݙا مرکز بݨسی۔اے ڳال انھاں جمعے کوں حسن ابدال اچ ریلوے سٹیشن دی اپ گریڈیشن دی افتتاحی تقریب توں خطاب کریندے ہوئیں آکھی اے ۔وزیر اعظم آکھیے جو نویں پاکستان اچ ریلوے دی وݙی اہمیت اے کیوں جو ریل دے ذریعے عام بندہ سستا تے آرام آلا سفر کریندے ،ساری دنیا اچ ریل سفر دا بہترین ذریعہ اے ۔وزیراعظم ایں امر تے افسوس دا اظہار کیتے جو انگریز دے ݙتے ڳے ریلوے نظام کوں ترقی نی ݙتی ڳی ،اینکوں ودھاوݨ دی بجائے ایندے وچ 50 کلومیٹر دی کمی تھی ڳی ۔ انہاں آکھیے جو چین دنیا اچ ساریں توں تکھی ترقی کرݨ آلا ملک اے تے چین اپݨے ملک اچ دنیا دی تیز ترین ریلو ے دا نظام وچھایا ۔ چین دی مدد نال ملک اچ پہلی واری وݙی سرمایہ کاری آندی پئی اے۔ ایم ایل ون 9 ارب ڈالردا منصوبہ اے۔ چین نال ڳال مھاڑ دے ذریعے ایں منصوبے کوں 6 ارب ڈالر تئیں گھن آیوں ۔ ایم ایل ون منصوبے نال کراچی توں لاہور دا سفر صرف 7 گھنٹے دا تھی ویسی۔ منصوبے دے تحت ٹریک تے انڈر اتے اوور پاسز بݨ ویسن ۔گیٹ لڳسن تے روزگار دے موقع پیدا تھیسن ۔وزیراعظم آکھیے جو ایں منصوبے نال ملکی معیشت کوں وی فائدہ تھیسی تے کاروبار سوکھا تھیسی ،انہاں ایں خواہش دا اظہار کیتے جو پاکستان ایجھا ملک بݨ ویسی جیں کوں قرضہ نہ منگݨاں پووے کیوں جو موجودہ حکومت کوں ہک ایجھا ملک ورثے اچ ملیے جیرھا جو قرڄے دے بوجھ تلے آیا ہویا اے ۔انہاں آکھیے جو معاشی ترقی اچ پاکستان ریلوے اہم کردار ادا کریسی ۔ حکومتی اقدامات نال معیشت ترقی کریندی پئی اے ۔انہاں آکھیے جو آئین پاکستان اچ سارے شہریاں کوں برابر دے حقوق حاصل ہن۔ سکھاں دے مقدس جہیں پاکستان وچ ہن ،اساں کوشش کیتی جو سکھ یاتریاں کوں بہتر سہولتاں ݙتیاں ونڄن تے انہاں کیتے آسانیاں پیدا کیتیاں ونڄن پاکستان ایجھا ملک بݨسی جتھاں لوک ٻاہروں آسن ۔ملک اچ سیاحت دے ودھارے کیتے اقدامات کیتے ویندے پئن ۔ ویزہ سسٹم کوں بہتر بݨِاوݨ تے سیاحت دی ترقی کیتے مزید اقدامات دی لوڑھ اے۔
پاکستان کوایجھا ملک بݨاوݨ چاہندوں جو ٻاہروں قرضہ نہ منگݨاں پووے ، ایم ایل ون دی صورت اچ پاکستان اچ پہلی واری چین وݙی سرمایہ کاری کریندا پئے۔ وزیر اعظم عمران خان
مضمون کا ماخذ : ہیوگو 2
متعلقہ مضامین
