وزیراعظم عمران خان دا حکومت دے ڈو سال پورے تھیونڑ تے نجی ٹی وی چینل کوں انٹرویو

اسلام آباد۔ 18 اگست (اے پی پی) وزیراعظم عمران خان آکھیے جو میڈی جدوجہد دا مقصد پاکستان کوں حقیقی ریاست بنڑاونڑ اے ،دنیا اچ مسئلہ کشمیر کوں چیندے رہ ویسوں ، پاکستان دا اسرائیل بارے موقف واضح اے، پاکستان اسرائیل کوں نی من سگدا ، سعودی عرب دے نال مساوی تعلقات ہن ،پاکستان دا مستقبل چین دے نال جڑیا ہویا اے ،حکومت سنبھالی تاں ترائے وڈے چیلنجز ہن ، قومی ادارے تباہ تھی گے ہن، خزانہ خالی ہئی تے باہرلے قرضیں دا بوجھ ہئی، اساں کرنٹ اکاﺅنٹ خسارہ، تجارتی خسارہ اتے قرضے دے مسئلے اچ جکڑیے پیوں ، ملک دی ترقی کیتے انہاں مسلیں کوں حل کرنڑاں پوسی ، سابقہ حکومتاں دے بجلی دے مہانگے معاہدیں اچ واضح کرپشن نظر آندی پئی اے ۔میڈی زندگی دا مقصد مافیا دا مقابلہ کرنڑاں اے ،کراچی پاکستان دا معاشی انجنڑ اے ، ایں شہر دے مسئلے حل کیتے ویسن تے اساں دنیا کوں دے ترقی یافتہ شرہاں دی صف اچ گھن آسوں ،اپوزیشن جماعتاں دی قیادت دا مقصد حکومت کوں غیر مستحکم کرنڑاں اے ، احتساب دے معاملے توں پچھی تے ہٹیے تاں ملک دا کوئی مستقبل کائناں ہوسی ۔ منگل کوں حکومت دے ڈو سال پورے تھیونڑ تے ہک نجی ٹی وی چینل کوں ڈتے گئے انٹر ویو اچ وزیراعظم عمران خان آکھیے جو جڈاں حکومت سنبھالی تاں ملکی معیشت دیوالیہ تھیونڑ دے نیڑے ہئی ، 20 ارب ڈالر کرنٹ اکاﺅنٹ خسارہ ہئی ،کرنٹ اکاﺅنٹ خسارہ گھٹ کرتے 3 ارب ڈالر تے گھن آیوں ، تجارتی خسارہ 40 ارب ڈالر ہووے تاں پورے دی قدر ڈھہہ ویندی اے ،روپے دی قدر ڈھاندی اے تاں مہانگ تھیندی اے ، حکومت دے پہلے ڈو سالاں اچ ڈو ہزار ارب ملک دے قرضیں دی قسطاں اچ گن ، گھاٹا ودھے تاں خرچے گھٹ کرنڑیںپوندن ،اساں خرچے گھٹ کیتے ڈو سال بعد اساں پرائمری بجٹ کوں بیلنس کیتا ۔انہاں آکھیے جو ڈوجھا مسئلہ انرجی دا ہئی ، سابقہ حکومتاں بجلی دے مہانگے معاہدے کیتے ، اساں دنیا دی مہانگی بجلی بنڑیندے پیوں ، حکومت اتے آئی پی پیز دا معاہدیں اچ نظرثانی کیتے متفق ہوونڑ وڈی کامیابی اے، مہنگی بجلی دا ساریں توں وڈا ضیان انڈسٹری دا تھیندے ، آئی پی پیز توں نویں سروں زبردست معاہدہ تھے ، آئی پی پیز دا معاہدے تے شکریہ ادا کرینداں، مثبت قدم اے، جڈاں بجلی دی پیداواری لاگت گھٹ کائناں تھیسی مسئلے حل کائناں تھیسن ۔ وزیراعظم عمران خان آکھیے جو اساں توانائی دی صورت حال بہتر بنڑاونڑ کیتے جامع پاور پالیسی گھن آسوں ۔ ایلیٹ کلاس خود کوں قانون توں بالاتر سمجھدی اے ، نیب جڈاں ایلیٹ کلاس کوں سڈیندے تاں تاں اکھیندن جو ملک تباہ تھی گے ۔انہاں آکھیے جو میڈی زندگی دا مقصد مافیا دا مقابلہ کرنڑ اے ، شوگر کمیشن کھنڈ بحران دی تحقیقات کیتیاں تاں ایندے اچ جہانگیر ترین دا ناں آیا جیں تے میکوں افسوس تھئے ۔ وزیراعظم عمران خان آکھیے جو ہک چنگے لیڈر کوں صادق اتے امین ہوونڑاں چاہیدے جیں اچ اے صلاحیت نہ ہووے او لیڈر نی تھی سگدا ۔ کراچی دی صورتحال دے حوالے نال وزیراعظم عمران خان آکھیے جو کراچی پاکستان دا معاشی انجنڑ اے ، شہر دی حالت ڈیکھ تے ڈکھ تھیندے، 18ویں ترمیم دے ذریعے صوبیں کوں اختیارات ڈتے گے ، 80 دی دہائی اچ اگر لسانیت اتے تشدد نہ ودھدا تاں الطاف حسین جیرھا گند کلچر گھن آئے او او نہ ہوندا تاں کراچی دبئی توں ودھ ترقی کریندا ،اساں کراچی کوں میٹروپولیٹن سٹی بنڑاونڑ چاہندون جیں نال شہر دی ترقی تھیسی،انہاں آکھیے جو مینھ وسنڑ دے بعد نیشنل ڈیزاسٹرمینجمنٹ اتھارٹی (این ڈی ایم اے) کوں کراچی بھیجے۔ انہاں آکھیے جو دنیا دی ترقی یافتہ شہراں نیویارک، لندن اتے پیرس اچ وی میٹروپولیٹن نظام اے، سندھ اچ لوکل گورنمنٹ سسٹم ہوونڑاں چاہیدے جیرھا جو ایندا آئینی حق اے۔ چین 70 کروڑ لوکاں کوں غربت اچوں کڈھیے ۔انہاں آکھیے ۔جہانگیر ترین دے حوالے نال وزیراعظم عمران خان آکھیے جو جہانگیر ترین میڈی ست اٹھ سال دی جدوجہد اچ نیڑے دا ساتھی رہیا اگر انہاں کوں چھور تے کاروائی کریندا تاں لوک اکھیندے توں نشانہ بنڑایا گئے ۔ افسوس اے جو جہانگیر ترین ایندے وچ آگے ،ایں قسم دے فیصلے کرنڑیں پوندن ،لیڈر کوں صادق تے امین ہوونڑاں چاہیدے ۔وزیراعظم آکھیا جو جہانگیر ترین کوں مجرم ڈکلیئر کائنی کیتا، رپورٹ اداریں ڈے چلی گی اے اوہے ایندے تے کاروائی کریسن ،ایندے اچ کوئی شک کائنی جو جہانگیر ترین بئے لوکان توں بہتر اے ۔انہاں آکھیا جو اللہ دا خاص کرم اے جو پاکستان اچ صورتحال اتنی خراب کائنی تھئی،اساڈا ہمسایہ ایران وائرس توں بہوں متاثر تھیے۔وزیراعظم آکھیا جو میں ثانیہ نشتر کوں احساس ایمرجنسی کیش پروگرام شروع کرنڑ تے داد ڈینداں،بل گیٹس وی کورونا بحران وچال اساڈی حکمت عملی دی تعریف کیتی اے،بل گیٹس کوں ڈسیا جو اسمارٹ لاک ڈاﺅن تلویں طبقے کوں ریلیف ڈتے۔انہاں آکھیا جو مسلم لیگ ن دی حکومت اچ پاکستان گرے لسٹ اچ ہئی ،اپوزیشن جماعتاں ایف اے ٹی ایف معاملے تے بلیک میلنگ کیتی اے،اپوزیشن نیب قانون اچ ایجھی شقاں ختم کرنڑ چاہندی ہئی جئیں نال نیب دا ادارہ ختم تھی ونجے،اپوزیشن جماعتاں این آر او منگدی پئن ،کیا میں وی مشرف وانگوں انہاں کوں این آر او ڈے ڈیواں،اپوزیشن کوں این آر او ڈتا تاں ملک نال غداری ہوسی۔انہاں آکھیا جو مسلم لیگ ن دے لوکاں مریم نواز دی پیشی تے پتھراﺅ کیتے،اے لوک نیب اچ اینویں ویندن جینویں نیلسن منڈیلا ہووے،اپوزیشن لیڈر انہاں دا ہکو مقصد اے جو میکوں بلیک میل کرنڑ اتے حکومت کوں غیر مستحکم کرنڑ۔اساں کہیں توں بلیک میل کائنا تھیسوں۔انہاں آکھیا جو اپوزیشن ولوں عمران خان کون پہلے ڈینھ توں ہٹاونڑ دی گالھ تھیندی پئی اے،پاکستان دے فائدے اتے انہاں دے فائدے ہکو جیہے کائنی،اساں اپنڑاں کم کریندے پیوں اتے نیب دے سامھے اتے عدالتاں دے سامھے کھڑوں،اے ہنڑ عدالتاں دا امتحان اے۔انہاں آکھیا جو میں اپنڑ گھر اچ رہنداں پیاں،میںباہر دے دورے کرینداں تا ں ڈیڈھ لکھ ڈالر اچ اے دورہ کرینداں،زرداری اتے نواز شریف اےہو دورے ڈاہ توں 12لکھ ڈالر اچ کریندے ہن۔عمران خان آکھیا جو وزیراعلیٰ پنجاب عثمان بزدار تے شراب لائسنس دا الزام مذاق اے،شراب دے لائسنس دے معاملے تے وڈے صوبے دے چیف ایگزیکٹو کوں سڈیا گئے ،ایں معاملے تے ایکسائز کوں سڈنڑاں چاہیدا ہئی ۔انہاں آکھیا جو اساڈی پارٹی پہلی واری اقتدار اچ آئی،کجھ ہک لوکاں دے علاوہ کہیں ڈے تجربہ کائنا ہئی ،شریف ٹبر دے 30سالیں دی اقتدار دی جڑاں مضبوط ہن،سٹیسٹس کو دے خلاف جنگ سوکھی کائنی۔انہاں آکھیا جو ماضی اچ سیاسی بھرتیاں کیتی گئن،ریلوے اتے پی آئی اے اچ وی بھرتیاں کیتی گئن،پی آئی اے اچ چار سو ارب روپے دا گھاٹا اے۔پی آئی اے کوں منافع بخش ادارہ بنڑیسوں۔ہک سوال دے جواب اچ انہاں آکھیا جو معیشت کمزور ہووے تاں سرمایہ کاری نی تھیندی،نجکاری اچ اساں سست ہیسے اے گالھ منیندوں،پاکستان اچ تریجھا مسئلہ ایہو اے۔پی ٹی وی 14ارب روپے دی پنشن ڈیندا پئے ،سیاسی بھرتیاں ہر ادارے اچ تھین،، وفاق دا 500 ارب بجٹ اے، 460 ارب روپے پنشن اچ ویندن پئے ۔انہاں آکھیا جو مافیا ہنڑ سندھ اچ کھنڈ ذخیرہ اندوزی کریندی پئی اے،مافیا کوں پتہ اے کو سندھ اچ اساڈی حکومت کائنی۔انہاں آکھیا جو اسرائیل بارے اساڈ موقف نشابر اے،پاکستان اسرائیل کوں کڈاہیں نی من سگدا،قائد اعظم آکھیا ہئی جو اسرائیل کوں فلسطنیاں دے حقوق ڈیونڑے پمسن۔انہاں آکھیا جو سعودی عرب ہر اوکھ اچ پاکستان دے نال تھیے،سعودی عرب دی اپنڑی خارجہ پالیسی اے،پاکستان دا مستقبل چین نال اے۔انہاں آکھیا جو انسان اللہ کوں جواب ڈیونڑے،اسرائیل اتے فلسطین دی گالھ کریندن تاں کیا اساں فلسطین دے نال تھیونڑ آلے سلوک تے اکھیں بند کر گھنوں۔انہاں آکھیا جو میں انتخابات دی تیاری کائنی کریندا پئیا،میں پاکستان دے مستقبل کوں ڈیکھداں پیاں،پاکستان دے نینگراں دے فائدے کوں ڈیکھداں پیاں،پاکستان کوں اللہ ہر شعبے اچ پوٹینشل ڈتے۔سیاحت،زراعت اہم شعبے ہن۔انہاں آکھیا جو پاکستان دا کردار مسلم دنیا کوں کٹھا کرنڑاں اے،فلسطین بارے اساں اللہ کوں جواب ڈیونڑے۔